Biden e Macron takohen në një kohë kur raportet SHBA-Francë janë tensionuar

Presidenti i Shteteve të Bashkuara të Amerikës, Joe Biden, i tha presidentit francez, Emmanuel Macron, të premten se Uashingtoni kishte qenë “i ngathët” në trajtimin e tij të një pakti të fshehtë sigurie Australi-MB-SHBA në Indo-Paqësorin që zemëroi Parisin.

Takimi në ambasadën franceze në Romë përpara samitit të G20 ishte mundësia e tyre e parë personalisht për të ndrequr përçarjen diplomatike të hapur muajin e kaluar nga shpallja e paktit.

Ndërsa Biden nuk i kërkoi falje zyrtarisht Macronit, ai pranoi se Uashingtoni nuk duhej të kishte zënë në befasi aleatin e tij më të vjetër.

“Unë mendoj se ajo që ndodhi ishte – për të përdorur një frazë angleze – ajo që bëmë ishte e ngathët”, tha Biden, duke shtuar se marrëveshja e nëndetëseve “nuk u bë me shumë hir”.

“Kisha përshtypjen se Franca ishte informuar shumë kohë më parë,” shtoi ai.

Parisi reagoi me zemërim ndaj partneritetit të AUKUS dhe njoftimit se komponenti kryesor i tij do të rezultojë në heqjen e një marrëveshjeje prej shumë miliardë eurosh për nëndetëset franceze në favor të teknologjisë nga SHBA dhe MB.

Uashingtoni u befasua dukshëm nga reagimi dhe kritika shumë e fortë franceze se nuk u konsultua megjithë marrëveshjen me Australinë dhe faktin se është i vetmi vend evropian që ka territore në rajon.

Një Macron i pakënaqur priti një javë përpara se të fliste me Joe Biden, një bisedë telefonike që ndihmoi në nxitjen e një detente.

Të dy udhëheqësit më pas nisën një “proces konsultimesh të thella” për të rivendosur besimin e fituar me vështirësi midis dy aleatëve. /Shqip.com