Arrestohet agjenti i Shërbimit Informativ Gjerman, dyshohet për lidhje me Rusinë

Prokuroria Publike Federale e Gjermanisë e ka arrestuar një punonjës të Shërbimit Federal të Inteligjencës (BND) nën dyshimin për tradhti. Ai thuhet se ka transmetuar informacion tek një shërbim inteligjent rus këtë vit, siç njoftoi autoriteti të enjten në Karlsruhe.

BND njoftoi në Berlin se i akuzuari ishte sjellë para gjykatësit hetues të Gjykatës Federale të Drejtësisë të enjten. I dyshuari tani ndodhet në paraburgim. Gjithashtu, u kontrolluan dy zyre të BND-së.

Pasi BND-ja mori informacionet për një rast të mundshëm të dyshuar brenda radhëve të saj si pjesë e punës së saj të inteligjencës, shërbimi filloi menjëherë hetime të brendshme të gjera, tha presidenti i BND, Bruno Kahl.

Pas konfirmimit të dyshimit, menjëherë është thirrur Prokurori Publik Federal.

“Ne punojmë ngushtë dhe me besim me autoritetet hetimore për të sqaruar plotësisht rastin”, tha Kahl.

BND nuk dëshiron të japë asnjë detaj – shqetësim për rrezikun nga Rusia

Pa marrë parasysh hetimet në vazhdim, BND-ja nuk do të komentojë publikisht detaje të mëtejshme të rastit deri në një njoftim tjetër, theksoi Kahl.

“Përmbajtja dhe diskrecioni janë shumë të rëndësishme në këtë rast të veçantë. Nga ana tjetër, Rusia llogaritet si aktor në këtë rast“, shtoi presidenti i BND-së.

Shkak i këtyre deklaratave mund të jetë shqetësimi për rreziqe të mundshme për kontaktet dhe informatorët e shërbimit sekret gjerman në Rusi, të cilët mund të ishin tradhtuar nga spiuni i dyshuar në radhët e BND.

Kahl theksoi se çdo detaj i procesit që u bë publik do të thotë një avantazh për këtë kundërshtar për të dëmtuar Gjermaninë.

Prandaj, në këtë rast, sipas tij suksesi i hetimit varet nga “që sa më pak të bëhet publike derisa Prokurori i Përgjithshëm të ketë përfunduar hetimin e tij”, shkruan mediumi gjerman, Focus.de

Rastet e spiunazhit në BND

Një i ashtuquajtur nishan – një agjent i dyfishtë në BND – u ekspozua për herë të fundit në vitin 2014. Dy vjet më vonë, burri u dënua me tetë vjet burg nga Gjykata e Lartë Rajonale e Mynihut për vite të tëra spiunazhi, kryesisht për shërbimin sekret amerikan CIA.

32-vjeçari i atëhershëm u shpall fajtor për tradhti dhe shkelje të sekretit zyrtar.

Midis 2008 dhe 2014, nëpunësi i trajnuar i zyrës i kaloi CIA-s më shumë se 200 dokumente të BND, disa prej të cilave ishin sekrete ose shpërthyese, dhe mblodhi të paktën 80 mijë euro për to.

Motivet që ai dha ishin mërzia, zhgënjimi dhe mos sfidimi në punën e tij. Mes dokumenteve të dorëzuara ishte një bazë të dhënash me kode dhe emra realë të agjentëve gjermanë jashtë vendit.

Burri mësohet se ka rrezikuar jetën e një burimi të BND-së jashtë vendit. Në vitin 2014 ai i ishte ofruar edhe shërbimit sekret rus me emaila.