Ambasadorët amerikanë në Ballkan mblidhen në Tiranë, këto janë temat e diskutimit

Ambasadorët amerikanë në Ballkan janë mbledhur në Tiranë në atë që është quajtur si konferenca e parë e Shefave Rajonalë të Misioneve amerikane. Në këtë takim ka marrë pjesë edhe ambasadori i Shteteve të Bashkuara në Kosovë, Jeff Hovenier.

Përpos ambasadorit në Prishtinë dhe nikoqires ambasadores amerikane në Shqipëri, Yuri Kim, të pranishëm ishin edhe ambasadori amerikan në Serbi, Christopher Hill, i ngarkuari me punë në Ambasadën e SHBA në Kroaci, Mark Fleming, ambasadorja amerikane në Mal të Zi, Judy Rising Reinke, ajo në Maqedoni të Veriut, Angela Aggeler, ambasadori i SHBA në Greqi, George Tsunis, ai në Bullgari, Kenneth Merten si dhe ambasadori në Bosnje, Michael Murphy.

Pleased to host fellow 🇺🇸 ambassadors to 🇧🇦 🇧🇬 🇭🇷 🇬🇷 🇽🇰 🇲🇪 🇲🇰 🇷🇸 , plus @TheGEC Special Envoy Rubin & Deputy Asst Sec Escobar, to discuss & coordinate US priorities in the Balkans (I believe it’s the first such gathering to take place in 🇦🇱 Tirana) pic.twitter.com/38fZLMHtFa

— Ambassador Yuri Kim (@USAmbAlbania) April 13, 2023

Po ashtu, në këtë takim ishin edhe i dërguari i Shteteve të Bashkuara për Ballkanin Perëndimor, Gabriel Escobar si dhe përgjegjës i Qendrës Globale të Angazhimit, James Rubin.

Siç bëri të ditur Ambasada amerikane në Tiranë, diplomatët e lartë amerikanë diskutuan prioritetet rajonale dhe globale, duke përfshirë pushtimin rus të Ukrainës, mundësitë e energjisë, forcimin e institucioneve demokratike dhe luftimin e korrupsionit.

Ambasadori amerikan në Kosovë, Jeff Hovenier, e quajti këtë takim si një mundësi e mirë për diskutim me homologët e tij në Ballkan.