Aktakuzë ndaj një gorani për krime lufte në Suharekë e Rahovec

Prokuroria Speciale e Kosovës, ka ngritur këtë të mërkurë aktakuzë në Gjykatën Themelore në Prishtinë kundër të pandehurit Sh.L. i nacionalitet goran, për shkak të dyshimit të bazuar se në bashkëkryerje me persona të tjerë, e ka kryer krime lufte kundër popullsisë civile.

Siç thuhet në njoftim, i pandehuri në cilësinë e policit të Stacionit Policor në Prizren, gjatë kohës së luftës në Kosovë ka kryer vrasje, torturë, trajtim çnjerëzore ndaj popullatës civile të nacionalitetit shqiptar në Komunën Suharekës dhe Rahovecit.

“Hetimet kanë vërtetuar se, forcat policore serbe fillimisht i kanë arrestuar viktimat në regjionin e Suharekës dhe të Rahovecit dhe më pastaj i kanë dërguar në Stacionin Policor në Prizren. Aty i pandehuri i ka marr në pyetje duke përdorur torturë dhe trajtim çnjerëzore. Si rezultate i torturave i ndjeri R. J. ka vdekur kurse dhjetë (10) civile të tjerë kanë pësuar lëndime të rënda trupore dhe pasoja psikike”, thuhet tutje në njoftimin e prokurorisë.

Sipas njoftimit, kjo çështje penale tashmë i ka kaluar në kompetencë Departamentit Special të Gjykatës Themelore në Prishtinë për procedurë të mëtutjeshme.

I pandehuri gjendet nën masën e paraburgimit sipas vendimit të Gjyqtarit të procedurës paraprake deri në një vendim të ri nga ana e gjykatës.