Kurti: Të ushtrohet presion mbi Serbinë, që të zbardhen krimet e luftës në Kosovë

Kryeministri në detyrë i Kosovës, Albin Kurti, ka kërkuar një shtim të presionit ndërkombëtar ndaj Serbisë për hapjen e arkivave dhe zbardhjen e të vërtetës lidhur me krimet e luftës të kryera në Kosovë.

Ai theksoi se kjo është jetike për të sjellë drejtësi dhe për të ndëshkuar ata që janë përgjegjës për gjenocidin që ka ndodhur në Kosovë. Sipas Kurtit, është e nevojshme që sistemi i drejtësisë në Kosovë të veprojë me efikasitet dhe që të ketë mbështetje ndërkombëtare në zbardhjen e këtyre krimeve, të cilat kërkojnë përgjigje urgjente.

Në një postim në Facebook, Kurti përkujtoi masakrën e 27 prillit 1999 në Mejë dhe Korenicë, ku 376 civilë shqiptarë u vranë nga forcat serbe, dhe trupat e tyre u fshehën dhe u rivarrosën në disa varreza masive, përfshirë edhe në Serbi. Ai gjithashtu përmendi tragjedinë e Pashke Krasniqi Markaj, nënës që humbi dy djemtë e saj dhe që më vonë u vetëvra për të shprehur dhimbjen për humbjen e tyre. Kurti theksoi se viktima nuk janë vetëm ata që janë zhdukur, por edhe familjet e tyre, të cilat vazhdojnë të kërkojnë drejtësi për këtë krim që ende mbetet i pazbardhur.