Lajme

243 policë janë nën hetime, 61 u arrestuan vetëm për tetë muaj në Shqipëri

Ilustrim

Që nga fillimi i vitit 2022 deri më tani, agjencia e Mbikëqyrjes Policore në Shqipëri ka dorëzuar në prokurori për tu hetuar 243 efektivë të policisë në sektorë të ndryshme.

Siç ka raportuar Abc News Albania, krahas tyre, në organin e akuzës po hetohen edhe katër punonjës të Gardës së Republikës së Shqipërisë.

Referuar raportove mujore të AMP-së, gjatë kësaj periudhe janë arrestuar me masa sigurimi dhënë nga gjykata, 61 punonjës policie.

Policët e arrestuar dyshohen për shpërdorim detyre dhe korrupsion, por edhe për vepra të tjera penale, si mosveprim, apo veprime arbitrare.

Vetëm në muajin gusht, kjo Agjenci dërgoi për t’u hetuar në prokurori 26 efektivë të Policisë së Shtetit. Ndërsa gjykatat dhanë pesë masa sigurie për efektivët e hetuar, nga të cilët katër ishin arrestuar në flagrancë dhe një tjetër u arrestua pasi ishte me masë sigurie arrest në burg.

Dy nga rastet më të bujshme të arrestimit të efektivëve gjatë muajit të kaluar, ishte arrestimi i efektivit të Operacioneles, Jeton Lami i akuzuar për shpërdorim detyre, si person që ka shoqëruar me makinë të shumëkërkuarin Ervis Martinajn.

Ndërsa në fillim të gushtit u arrestua komisari i Elbasanit Arjan Tase, pasi me gomonen që drejtonte, vrau 7-vjeçaren Jonada Avdia në plazhin e Potamit.

Në raportin e APM-së, citohet se gjithsej në muajin që lamë pas, kjo Agjenci ka trajtuar 134 ankesa.

Numrin më të lartë të tyre e mbajnë ankesat për shkeljet që kanë kryer efektivët e Rendit dhe Sigurisë Publike. Janë trajtuar për këtë kategori 51 ankesa.

Lista e ankesave pasohet nga Policia Rrugore, ku janë trajtuar 46 ankesa. 29 ankesa të tjera janë trajtuar për efektivët e Hetimit të Krimit dhe për pak për sektorët e tjerë./Shqip.com

Shqip.com
Çmimet e derivateve në Kosovë Çmimi maksimal i lejuar për secilin produkt të naftës.
  • Dizel: 1.61
  • Benzine: 1.34
  • Gas: 0.76
Sot : 30/09/2022