Zelensky: Zbulohen mbi 400 krime lufte në Kherson pas tërheqjes së Rusisë

Presidenti i Ukrainës, Volodymyr Zelensky thotë se hetuesit kanë zbuluar më shumë se 400 krime lufte në zonat e Khersonit pasi forcat ruse u tërhoqën nga atje.

Siç raporton BBC, Zelensky tha se trupat e civilëve dhe ushtarëve ishin gjetur atje.

“Në rajonin Kherson, ushtria ruse la pas të njëjtat mizori si në rajonet e tjera të vendit tonë, ku ishte në gjendje të hynte. Ne do të gjejmë dhe sjellim para drejtësisë çdo vrasës. Pa dyshim”, tha Zelensky në paraqitjen e tij nëpërmjet videove në çdo mbrëmje.

Moska mohon se trupat e saj synojnë qëllimisht civilët.

Ndërkohë autoritetet ukrainase vunë një ndalim gjatë natës dhe kufizuan udhëtimin brenda dhe jashtë Khersonit.

Që nga fillimi i luftës, varre masive janë gjetur në zonat duke përfshirë Bucha, Izyum dhe Mariupol. Ukraina ka akuzuar trupat ruse se janë prapa mizorive.

Një komision i OKB-së muajin e kaluar tha se krime lufte ishin kryer në Ukrainë dhe se forcat ruse ishin përgjegjëse për “shumicën dërrmuese” të shkeljeve të të drejtave të njeriut në fillim të pushtimit.

Kherson ishte kryeqyteti i vetëm rajonal që u kap nga Rusia që nga pushtimi i Ukrainës në shkurt.

Rajoni, së bashku me tre të tjerë, u shpall nga Presidenti Vladimir Putin si pjesë e Rusisë, në një ceremoni në Kremlin në shtator.

Por qyteti Kherson u çlirua të premten. Turmat e ukrainasve që valvitnin flamuj i përshëndetën ushtarët e Kievit me përqafime dhe puthje.

Ukrainasit e shohin atë si një fitore të madhe kombëtare dhe poshtërim për Kremlinin.