Vuçiq: Rama po bën punë të mira, Kurti po gabon

Presidenti serb, Aleksandar Vuçiq, ka lavdëruar kryeministrin shqiptar, Edi Ramën, duke thënë se po bën punë të mira për popullin e tij, ndërsa për kryeministrin e Kosovës, Albin Kurti, ka thënë se është duke gabuar.

Sipas Vuçiqit, Kurti dëshiron ta bllokojë Kosovën me mesazhe shoviniste, kërcënime e shantazhe.

“Unë mendoj se Rama po bën punë të mira për njerëzit e tij, dhe fakti që Kurti nuk e kupton këtë dhe mendon se është koha për të mbyllur hapësirën me mesazhe shoviniste, kërcënime dhe shantazhe … Unë mendoj se ai është shumë i gabuar, por nuk kam asgjë kundër kësaj”, tha të enjten ai, shkruan B92, transmeton Shqip.com.

Tutje, Vuçiq është shprehur se i vjen keq që disa në rajon janë kundër nismës “Ballkani i Hapur”.

“Dhe të mos bashkëpunojnë me njëri -tjetrin. Por kjo është zgjedhja e tyre, dhe e jona është bashkëpunimi, hapja dhe përparimi. Por, të gjithë kanë të drejtë të zgjedhin të ardhmen e tyre,” tha Vuçiq, duke iu drejtuar mediave.

Sot në Shkup u mbajt Forumi Ekonomik për Bashkëpunim Rajonal në kuadër të nismës së “Minishengenit” dhe liderët e Shqipërisë, Serbisë e Maqedonisë së Veriut nënshkruan disa marrëveshje e memorandume mirëkuptimi.

Kosova menjëherë reagoi duke thënë se nuk e përkrah një nismë të tillë dhe se ajo “është pa vizion”./SHQIP.com