SHBA-ja sulmon zonën Deir al-Zor e cila kontrollohet nga Irani dhe forcat siriane
Ushtria amerikane ka njoftuar se ka sulmuar qytetin sirian, Deir al-Zor, përkatësisht pikat e përdorura nga grupet e lidhura me Gardën Revolucionare Islamike të Iranit.
Siç raporton Radio Evropa e Lirë, komanda qendrore e ushtrisë amerikane, ka thënë se këto sulme kanë për synim të mbrojnë forcat amerikane nga sulmet e grupeve të mbështetura prej Iranit.
Sulmet “kanë pasur qëllim të kufizojnë rrezikun e përshkallëzimit dhe që të minimizojnë rrezikun për viktima”, kanë deklaruar nga Komanda amerikane.
Shtetet e Bashkuara të Amerikës nuk kanë dhënë detaje që do të identifikonin shënjestrat dhe as nuk kanë ofruar të dhëna nëse ka pasur të vdekur si pasojë e sulmeve.
Sipas ushtrisë amerikane, urdhri për sulm është dhënë nga presidenti amerikan, Joe Biden.
“Sulmet e sotme kanë qenë të nevojshme për të mbrojtur personelin amerikan”, ka thënë zëdhënësi i Komandës Qendrore, Joe Buccino, përmes një deklarate.
Buccino, ka deklaruar se ky sulm ka qenë një kundërpërgjigje ndaj sulmit të 15 gushtit që ka shënjestruar forcat amerikane, kryesisht bazën ushtarake al-Tanf Garrison.
Mirëpo, për sulmin e 15 gushtit, SHBA-të patën thënë se në atë sulm nuk ka pasur dëme e as viktima.
Deir al-Zor është provincë siriane në kufi me Irakun që po kontrollohet nga grupet e mbështetura nga Irani dhe forcat siriane./Shqip.com