Rusia kërcënon Francën me luftë: Do keni probleme nëse dërgoni ushtrinë në Ukrainë

Ministri rus i Mbrojtjes paralajmëroi homologun e tij francez se do të kishte pasoja për Parisin nëse do të dërgojë trupa ushtarake në Ukrainë.

Siç raporton AP, në një telefonatë të rrallë, Sergei Shoigu i tha ministrit francez të mbrojtjes Sébastien Lecornu se nëse Parisi konkretizon deklaratat e tij për mundësinë e dërgimit të një kontigjenti ushtarak francez në Ukrainë, “kjo do të krijojë probleme për vetë Francën“.

Presidenti francez, Emmanuel Macron, la të kuptohej dy muaj më parë se mundësia e dërgimit të trupave perëndimore në Ukrainë nuk mund të përjashtohej.

Zyrtarët francezë që atëherë kanë sqaruar se sugjerimi kishte të bënte me përdorimin e trupave për stërvitje dhe operacione të tjera larg vijave të frontit.

Por telefonata mes dy ministrave shënon kontaktin e parë të këtij niveli që nga tetori 2022.

Franca e ka mohuar pretendimin e Rusisë për një diskutim mbi bisedimet e mundshme për Ukrainën, sipas Agence France-Presse.

Ministria ruse e Mbrojtjes deklaroi se Shoigu dhe Lecornu diskutuan potencialin për bisedime mbi konfliktin në Ukrainë gjatë bisedës telefonike të zhviluar më 3 prill, por këtë pretendim Parisi e mohoi menjëherë.

“Franca as nuk pranoi dhe as nuk propozoi ndonjë gjë të tillë për konfliktin”, citon AFP një burim brenda kësaj ministrie.