“Po mbahen padrejtësisht në burg”, PSD-ja kërkon lirimin e Molliqajt dhe Megjuanit
Partia Socialdemokrate ka kërkuar lirimin “e menjëhershëm” të kryetarit të saj, Dardan Molliqajt dhe aktivistit Adem Megjuani, pasi “po mbahen padrejtësisht në burg”.
Sipas partisë, Molliqajt nuk i është treguar fletë-arresti as para se të arrestohej e as në stacionin policor.
“Asnjë ftesë për thirrje nuk i është dorëzuar Dardan Molliqajt sipas Procedurës së Kodit Penal. Dardani ka qenë në shtëpinë e tij dhe në zyrë”, thuhet në reagimin e PSD-së në Facebook.
“Ai ka vazhduar aktivitet e tij, takimet në qytet e konferencën për media në zyrë. Arrestimi i tij, me 60 policë, pak para emisionit televiziv, është politik. Pushteti dëshiron të hesht opozitën kritikuese”.
Ndërkohë, për aktivistin Megjuani PSD-ja thotë se iu ka përgjigjur pozitivisht ftesës së pranuar nga policia dhe është paraqitur në stacionin policor në kohën e caktuar sipas ftesës.
“Pavarësisht kësaj, ndaj tij u shqiptua masa e ndalimit prej 48 orëve. Kjo tregon që çështja nuk është aspak procedural”.
“Qëllimi përfundimtar i një aksioni të tillë të arrestimit, me plot skandale e parregullsi është frikësimi. Por nuk frikësohemi, as nuk zmbrapsemi”.
Arrestimi i Molliqajt ka ardhë pasi i njëjti gjatë protestës të mbajtur më 29 janar, kishte goditur me shuplakë zyrtarin policor.
Policia ishte vënë në kërkim të kryetarit të PSD-së nga dita e dielë./Shqip.com