Lajme

Përfundon mbledhja në Pejë, kryetarët e komunave të pakënaqur

Mbledhia në Pejë

Takimi në mes kryeministrit Albin Kurti me kryetarët e komunave tashmë ka përfunduar.

Pas këtij takimi, Kurti ka thënë se mbledhja ka shkuar mirë dhe tashmë do të mblidhen çdo tre muaj.

” Do ta mbajmë çdo tre muaj por do të takohemi më shpesh për çështjet specifike të komunave. Kjo ishte mbledhje më shumë për hallet e përbashkëta të tyre dhe çdo gjë shkoj me një atmosferë konstruktive të bashkëpunimit për zhvillim ndërmjet qeverisë qendrore, udhëheqjeve komunale por edhe lidhur me institucionet e ndryshme të tjera shtetërore dhe donatorët ndërkombëtar”, tha ai.

Ndërsa, kryetarët e komunave kishin kërkesa të shumta, e për këtë ka folur edhe kryetari i Komunës se Rahovecit, Smajl Latifi.

Smajl Latifi, kryetar i Rahovecit

Ai tha se kanë paraqitur pakënaqësitë dhe kërkesat e tyre te qeveria, mirëpo nuk kanë marrë ndonjë koment.

“Ne nuk morëm komentet të cilat zakonisht duhet t’i japin kryeministri bashkë me ministrat prezentë….Ne i paraqitëm shqetësimet serioze të cilat i kemi edhe nga pikëpamja e ngecjes në investimet publike kapitale, për shkak të kontratave të cilat janë lidhur më herët, ngritjes së çmimeve dhe kjo është një bllokadë për operatorët ekonomik, sepse ata nuk po rikthehen në punishte”.

Ai tha se ka insituar edhe për ligjin për subvencionimin e humbjeve.

Insistova që ligji për subvencionimin e humbjeve, për operatorët e kontratave të cilat janë lidhur para rritjes së çmimeve të miratohet sa më shpejtë dhe të hynë në fuqi. Kemi biseduar edhe për kontratën kolektive, vështirësitë dhe barrën e rëndë financiare që po e bartin komunat padrejtësisht”, tha ai.

Më tej, Latifi tha se kanë kërkuar definim të qartë që komunat të mos dëmtohen financiarisht për shkak të zbatimit të kontratave kolektive

Kryetari i Rahovecit tha se temë diskutimi ishte edhe çështja e vërshimeve. Sipas tij, duhet një pako emergjente nga qeveria në lidhje më këtë krizë.

“Biseduam edhe për çështjen e vërshimeve dhe kam kërkuar nga qeveria që komuna e Rahovecit, njëra nga komunat e goditura nga vërshimet ta ketë një pako emergjente financiare për t’i kompensuar dëmet e shumta që i kemi në ekonomi familjare, bujqësi, në amvisëri, biznese, madje edhe në objekte publike siç e kemi një shkollë të dëmtuar dhe një qendër të mjekësisë familjare të dëmtuar…sepse kjo krizë globale e ka dëmtuar bujqësinë”, tha ai.

Nënkryetari i LDK-së, Gazmend Muhaxheri

Kryetari i Komunës së Pejës, Gazmend Muhaxheri tha se ka bërë kërkesë për projektin e rrugës Kiev-Pejë.

Sipas tij, është viti i katërt që ky projekt nuk ka përfunduar.

“Kërkesa e komunës së Pejës për projektin Kiev-Pejë, autostrada që është viti i katërt që po prangohet dhe janë tri qeveri që janë marrë me këtë punë dhe nuk e kanë adresuar këtë çështje ose s’kanë mbërri t’i zhvillojnë procedurat e tenderimit dhe t’i japin rrugë, edhe pse kanë mundur ta kryejnë këtë punë shumë shpejtë”, tha ai.

Alban Hyseni, kryetar i komunës së Gjilanit

Kryetari i Gjilanit, Alban Hyseni tha se takimi ka shkuar jashtëzakonisht mirë. Ai tha se fokusi ishte më tepër në problematikat e përgjithshme të qytetareve nëpër komuna.

Ai tha se është diskutuar edhe për takimin tjetër të radhës se ku do të mbahet, mirëpo nuk e kanë vendosur ende vendin.

Po ashtu, ka shtuar se qeveria është zotuar se do të vazhdojë t’i dalë në ndihmë komunave.

Ndryshe, bashkë me Kurtin në takim ishte edhe ministri i Administrimit të Pushtetit Lokal, Elbert Krasniqi, ministri i Financave Punës dhe Transfereve, Hekuran Murati, ku u diskutua për performancën buxhetore të komunave dhe investimet kapitale, energjinë dhe ujërat, investimet kapitale, agjendën e gjelbër, digjitalizimin në nivel lokal dhe strategjinë për menaxhimin dhe kontrollin e qenve me dhe pa pronar./SHQIP.com