Papa i bën thirrje Putinit të ndalë “spiralen e dhunës dhe vdekjes”
Papa Françesku i bëri një thirrje të dielën presidentit rus Vladimir Putin që të ndalojë “këtë spirale dhune dhe vdekjeje” në Ukrainë, duke thënë se kriza atje rrezikonte një përshkallëzim bërthamor me pasoja të pakontrollueshme globale.
Në një fjalim kushtuar Ukrainës dhe drejtuar mijëra njerëzve në sheshin e Shën Pjetrit, Françesku i bëri thirrje gjithashtu presidentit ukrainas Volodymyr Zelenskiy që të jetë i hapur ndaj çdo “propozimi serioz për paqen”.
Françesku tha se ai po bënte një apel urgjent “në emër të Zotit” për t’i dhënë fund konfliktit dhe tha se ishte “absurde” që bota po rrezikonte një konflikt bërthamor, raporton Reuters.
Duke folur dy ditë pasi Putin shpalli aneksimin e gati një të pestës së Ukrainës dhe vendosi rajonet nën ombrellën bërthamore të Rusisë, Françesku mbrojti gjithashtu të drejtën e të gjitha vendeve për “sovranitet dhe integritet territorial”.
“Apeli im i shkon mbi të gjitha presidentit të Federatës Ruse, duke i lutur që të ndalojë këtë spirale dhune dhe vdekjeje, qoftë edhe nga dashuria për popullin e tij”, tha Françesku./SHQIP.com
