Ministrat e financave të BE-së të gatshëm për të rritur sanksionet ndaj Rusisë

Ministrat evropianë të financave do të takohen në Luksemburg të martën për të diskutuar vendosjen e sanksioneve të mëtejshme ndaj Rusisë pas raporteve për krime të dyshuara lufte në Bucha.

“Ne kemi imazhe të reja nga satelitët mbi atë që po ndodh, çfarë po ndodhte në Bucha. Dhe ne duhet të reagojmë,” tha të martën Paolo Gentiloni, Komisioneri Evropian për Ekonominë.

Ministri francez i financave Bruno Le Maire tha se sanksionet e naftës dhe qymyrit janë një mundësi, shkruan CNN.

Le Maire tha se nuk ishte i sigurt se cili do të jetë pozicioni i 27 vendeve anëtare, por tha se ai mendon se ekziston “vendosmëria totale” e të gjitha vendeve anëtare për të zbatuar sanksionet.

Ministri lituanez i financave Gintare Skaiste bëri thirrje gjithashtu për marrjen e sanksioneve në një nivel tjetër, duke shkurtuar Rusinë nga burimet e saj kryesore të të ardhurave, sektori i saj i energjisë.

“Unë mendoj se ne duhet të shkurtojmë blerjen nga Rusia, naftë, gaz dhe qymyr. Dhe Lituania është vendi i parë në Bashkimin Evropian që i thotë lamtumirë gazit rus,” tha Skaiste.

Skaiste shtoi se në refuzimin për të blerë gaz nga Rusia, vendi i saj kishte dhënë një shembull të mirë për vendet e tjera evropiane.

Ajo shtoi se mbyllja e porteve dhe rrugëve për mallrat ruse dhe shkëputja e Gazprombank nga SWIFT duhet gjithashtu të merret në konsideratë.

Gazprombank përdoret nga blerësit e huaj për të paguar blerjet e gazit rus.

BE-ja pritet të shpallë sanksione të mëtejshme ndaj Rusisë që në fillim të kësaj jave dhe të punojë për të si “çështje urgjente”.

Blloku mund të forcojë sanksionet ekzistuese ose të ecë përpara me ndërprerjen e disa eksporteve ruse të energjisë.

Ministri i Financave i Gjermanisë, Christian Lindner tha të hënën se ndërprerja e furnizimit me gaz nuk ishte e mundur për momentin.