Mbappes i premtohet bonus marramendës nga Reali, por ky është kushti që duhet të përmbush lojtari

Real Madrid i ka ofruar Kylian Mbappes bonus prej 40 milion euro nëse qëndron edhe për një sezon në Paris Saint-Germain dhe vitin e ardhshëm nënshkruan me Los Blancos, transmeton Shqip.com.

Sulmuesi francez është në vitin e fundit të kontratës me parisienët, derisa është i lidhur për një kalim në “Santiago Bernabeu”.

Gazeta spanjolle “Marca”, ka pohuar se Mbappe i ka thënë Mauricio Pochettinos se ai nuk dëshiron të rinovojë kontratën e re me klubin.

Gjithashtu raportohet se klubi mbretëror i ka premtuar pagë tetë-shifrore nëse ai pret deri edicionin e ardhshëm për t’u transferuar në Madrid.

Los Blancos aktualisht nuk kanë financa të mjafueshme për transferimin e francezit, derisa PSG janë të etur për ta mbajtur lojtarin në kryqytet.

Megjithatë, Mbappe nuk ka thënë publikisht se dëshiron të largohet, madje ai pranoi se ëndrra e tij është të filojë Ligën e Kampionëve me PSG.

Fituesi i Kupës së Botës me Francën shënoi 27 gola në 31 paraqitje në Ligue 1 edicionin e kaluar.

Ndërkohë, Real Madrid nënshkroi me David Alaban nga Bayern Munchen me një transferim me parametra zero, derisa shpresojnë se një gjë të tillë do ta bëjnë edhe me Mbappen./Shqip.com