“Magjistari i vogël” nominohet për Topin e Artë

Në “Camp Nou” zbarkoi pa zhurmë të madhe, pasi vinte nga liga e dytë e futbollit spanjoll, teksa për kartonin e tij, Barcelona kishte paguar vetëm 5.8 milionë euro.

Ani pse është vetëm 18 vjeçar, Pedri Gonzales ka “rrëmbyer” zemrat e tifozëve blaguran, ndërsa sonte është nominuar në mesin e 30 futbollistëve që garojnë për Topin e Artë, shkruan Shqip.com.

Mesfushori spanjoll po konsiderohet si njëri nga talentët më të mëdhenjë të dalë në botën e futbollit viteve të fundit.

Ai ishte startues i padiskutueshëm te katalunasit në sezonën e kaluar, me Ronald Koemanin, i cili duket që ka besim të madh te “djaloshi i artë”.

Madje, Pedri ishte ftuar edhe nga kombëtarja spanjolle në kuadër të Kampionatit Evropian “Euro 2020”.

“Magjistari i vogël” u shndërrua për një kohë të shkurtër si pjesë e pandashme e formacionit të Luis Enriques dhe në fund të kompeticionit u zgjodh në 11-shen më të mirë të Evropianit, duke lënë pas tij shumë mesfushorë të klasit botëror.

Në përgjitësi, me klub dhe me kombëtare ai zhvilloi plot 72 ndeshje në sezonën e kaluar duke dhënë sinjale që qëndron mirë edhe në aspektin fizik./Shqip.com