Macron kundërshton përdorimin e termit “gjenocid” për të përshkruar mizoritë ruse në Ukrainë

Presidenti francez Emmanuel Macron refuzoi t’i përshkruante veprimet ruse në Ukrainë si “gjenocid” në një intervistë televizive me transmetuesin publik France 2.

I pyetur nëse edhe ai si presidenti Joe Biden, do të përdorte termin “gjenocid” për vrasjen e ukrainasve nga ushtria ruse, Macron tha se duhet të tregohet kujdes me terma të tillë, shkruan CNN.

“Unë do të isha i kujdesshëm me terma të tillë sot sepse këta dy popuj rusët dhe ukrainasit janë vëllezër”, tha Macron.

“Dua të vazhdoj të përpiqem, sa më shumë që të mundem, për të ndalur këtë luftë dhe për të rindërtuar paqen. Nuk jam i sigurt se përshkallëzimi i retorikës i shërben kësaj kauze,” shtoi ai.

Tutje ai tha se e sigurtë është se situata është e papranueshme dhe se ato që po ndodhin në Ukrainë janë krime lufte.

“Ne po jetojmë përmes krimeve të luftës që janë të paprecedentë në tokën tonë – tokën tonë evropiane”, ka shtuar ai.

Presidenti francez, i cili aktualisht kandidon për rizgjedhje, vuri në dukje gjithashtu bashkëpunimin e Francës me Ukrainën për të hetuar krimet e supozuara të luftës.

“Rusia ka filluar në mënyrë të njëanshme një luftë jashtëzakonisht brutale, tani është vërtetuar se ushtria ruse ka kryer krime lufte dhe tani duhet të gjejmë ata që janë përgjegjës”, tha Macron.

Biden tha të martën se mizoritë që po zbulohen në Ukrainë kualifikohen si  gjenocid , duke thënë se “është bërë gjithnjë e më e qartë se Presidenti rus Vladimir Putin thjesht po përpiqet të fshijë edhe idenë e të qenit ukrainas.

Ishte një përshkallëzim dramatik retorik në pikëpamjen e SHBA-së për atë që po ndodh në terren në Ukrainë, të cilën Biden e ka konsideruar më parë si krime lufte.

Emërtimi i SHBA-së nuk ka ndonjë degëzim ligjor, por ka peshë të konsiderueshme pasi Biden kërkon të mbledhë vendet pas një strategjie të izolimit dhe ndëshkimit të Moskës.

Liderë të tjerë botërorë, si Boris Johnson i Britanisë së Madhe dhe Andrzej Duda i Polonisë, kanë përdorur gjithashtu fjalën “gjenocid” për të përshkruar veprimet ruse në Ukrainë.