Kryeministri italian: Putin tha se nuk është koha e duhur për armëpushim në Ukrainë

Presidenti rus, Vladimir Putin i tha kryeministrit italian, Mario Draghi se nuk ishin krijuar ende kushtet për një armëpushim në Ukrainë.

Kështu tha Draghi në një konferencë shtypi të enjten kur u pyet për një telefonatë me Putinin një ditë më parë, raporton CNN.

Draghi tha gjithashtu se Putini i tha atij se kontratat aktuale të gazit mbetën në fuqi dhe se firmat evropiane do të vazhdojnë të paguajnë në euro dhe dollarë, dhe jo në rubla.

“Ajo që kuptova, por mund të jem i gabuar, është se konvertimi i pagesës … është një çështje e brendshme e Federatës Ruse,” tha Draghi.

I pyetur për rritjen e shpenzimeve të mbrojtjes pas pushtimit rus të Ukrainës, Draghi tha se Italia do të arrijë objektivin e NATO-s për të shpenzuar 2% të PBB-së për mbrojtjen në vitin 2028, duke shtuar se kjo nuk ishte e diskutueshme midis anëtarëve të koalicionit të tij.

Megjithatë, Draghi tha se dokumenti i ardhshëm i parashikimit ekonomik të qeverisë nuk do të përcaktojë një rritje specifike në shpenzimet e mbrojtjes.