Lajçak pas vendimit të Qeverisë për reciprocitet: Duhet t’i parandalojmë tensionet
Emisari special i Bashkimit Evropian për dialogun Kosovë – Serbi, Miroslav Lajçak, ka komentuar vendimin e fundit të Qeverisë së Kosovës për vendosjen e reciprocitetit.
Sipas Lajçak, vendimi i Qeverisë ka ndryshuar temat dhe planet e vizitës së tij.
Lajçak ka bërë thirrje që të mos tensionohet situata dhe të punohet drejt normalizimit të marrëdhënieve.
“Unë erdha në rajon për t’u përgatitur për takimin e radhës të liderëve dhe për të folur për përparimin dhe normalizimin e marrëdhënieve, tani duhet ta zgjidhim këtë situatë. Nuk duhet të lejojmë që të ndodhë ndonjë krizë”, tha ai.
Lajçak për televizionin N1 nuk ka pranuar të komentojë deklaratën e presidentit të Serbisë, Aleksandar Vuçiq se Prishtina po planifikon një “sulm” në veri të Kosovës.
“Ne patëm një bisedë shumë serioze mbrëmë për situatën dhe sigurisht që duhet të kërkojmë zgjidhje përmes dialogut dhe jo konfrontimit”, tha Lajçak para gazetarëve.
Qeveria e Kosovës, ka vendosur më 29 qershor reciprocitet për dokumente në kufi për shtetasit serbë, duke e vazhduar edhe reciprocitetin për targat.
Pas këtij vendimi, Presidenti i Serbisë, Aleksandar Vuçiq, ka reaguar duke paralajmëruar bllokadë në dialog.
Theksojmë se Lajçak qëndroi për vizitë treditore në Prishtinë nga ku tha se është duke punuar në përgatitjen e një takimi midis kryeministrit të Kosovës, Albin Kurti, dhe presidentit të Serbisë, Aleksandar Vuçiq.
Në konferencën për media ka folur edhe për liberalizimin e vizave për qytetarët e Kosovës.
Ai ka thënë se ka kohë që Kosova i ka përmbushuar kriteret për liberalizimin e vizave dhe një gjë e tillë do duhej të kishte ndodhte deri tani./Shqip.com