Kusari: Të dëmtosh qeverinë duke dëmtuar vendin, nuk është as mençuri dhe as patriotizëm

Kryetarja e grupit parlamentar të Lëvizjes Vetëvendosje, Mimoza Kusari, ka thënë se kritikat nga qarqe brenda dhe jashtë vendit për stagnim në procesin e dialogut, jo vetëm që po tregojnë mungesën e reflektimit në përvojën e deritashme të pasukseshme në këtë proces, por edhe po synojnë të krijojnë bindjen e rreme se është Kosova ajo që nuk është konstruktive.
Kusari përmes një postimi në Facebook, ka shkruar se për ata brenda vendit, të mundohesh të dëmtosh Qeverinë duke dëmtuar vendin, nuk është as mençuri dhe as patriotizëm.
“Për ata jashtë vendit, është Serbia ajo që aspak nuk qëndron në linjë me parimet e demokracisë dhe lirisë. Rasti i fundit i agresionit Rus ndaj Ukrainës, dhe rreshtimi i Serbisë krah Rusisë, është treguesi më i mirë i mungesës së çfarëdo vetëdije të Serbisë për demokraci, liri dhe integritet territorial të shteteve të pavarura”, ka shkruar ajo.
Kusari gjithashtu ka thënë se guximi asnjëherë nuk është i barazvlefshëm me çmendurinë, por sipas saj është e kundërta.
“Prandaj, nuk është guxim ngarendja për të dëmtuar integritetin e sovranitetin e vendit. Madje kjo që po theksohet si guxim është frika më e madhe”, ka thënë ajo.
Kryetarja e Grupit Parlamentar të LVV-së ka thënë se as ecja me çdo kusht përkundër dëmit që i bëhet vendit nuk është as progres e as alternativë ndaj stagnimit.
Por sipas saj kombinimi i këtyre dy frazave ”guxim” dhe ”stagnim” në sensin e ngritjes së një urgjence për të nënshkruar me Serbinë përveçse ka qenë logjikë e negociimit të deritashëm është e rrezikshme dhe cenon pozicionin e Kosovës./Shqip.com