Kryeministri Kurti publikon fotot nga takimi me Mark Rutte: Kosova, përherë mirënjohëse ndaj NATO-s

Kryeministri i Kosovës, Albin Kurti ka publikuar fotot nga takimi që zhvilloi me Sekretarin e Përgjithshëm të NATO-s, gjatë vizitës së këtij të fundit në Prishtinë.

Kjo ishte vizita e parë e Rutte në Kosovë, si shef i NATO-s.

Kurti shprehet se Kosova i është mirënjohëse NATO-s për kontributin e aleancës për lirinë dhe garantimin e paqes.

Postimi i plotë

Kënaqësi e veçantë ta mirëpresim sot Sekretarin e Përgjithshëm të NATO-s, Mark Rutte, i cili e viziton Kosovën për herë të parë në pozitën e tij të re. Vendi ynë është përherë mirënjohës NATO-s për kontributin e saj të pazëvendësueshëm për liri dhe rolin e saj të çmueshëm për siguri dhe paqe.

Falënderimin sot e shprehim përmes vullnetit të pathyeshëm dhe synimit të pandryshueshëm që t’i bashkohemi Aleancës Veri-Atlantike për të kontribuar për paqe të qëndrueshme.