Konjufca: Të gjendet formë e re për Asociacionin, Kosova përballet me dy rreziqe
Kryetari i Kuvendit të Kosovës, Glauk Konjufca ka thënë se duhet të gjendet një formë e re për asociacionin e Komunave me Shumicë Serbe për shkak se marrëveshjen e arritur e ka hedhur poshtë Gjykata Kushtetuese.
Në një intervistë për media, Konjufca tha se Asociacioni nuk përmendet në planin franko-gjerman, por përmendet zbatimi i marrëveshjeve të arritura deri më tani që lënë të nënkuptohet më një formë edhe Asociacioni.
“Kryeministri para tre muajsh ka thënë që ky plan është i pranueshëm për Kosovën pra është bazë e mirë. Aty nuk përmendet kurrfarë Asociacioni, e tërë që mund të aludohet në atë plan është për marrëveshjet e deritanishme të arritura në dialog. Si është çështja, çështja është se këtë Asociacion e ka hedhur poshtë Gjykata Kushtetuese dhe gjendja është të gjendet një formë e re e Asociacionit, por është e vështirë në këto kushte kur Gjykata Kushtetuese e ka hedhur poshtë”, tha Konjufca.
Konjufca përmend rreziqe për Kosovën në këtë fazë të dialogut me Serbinë.
“Unë mendoj se janë dy rreziqe për Kosovën. E pse kjo nuk është zgjidhja më e mirë dhe pse është kompromis. Është kompromis sepse nuk e ka njohjen legale, por është njohje ‘defacto’, pra shtetësia e Kosovës nga Serbia nuk pranohet drejtpërdrejt por në mënyrë të tërthortë. Kjo I bjen që nuk pranohet me një akt shtetërorë të Serbisë, por përmes një marrëveshje me Bashkimin Evropian dhe që paraqet një rrugë të tërthortë”.
Kurse, sipas Konjufcës rrezik i dytë është së marrëveshja me Serbinë mund të mos e ketë formën e marrëveshjes përfundimtare.
“Kurse rreziku i dytë: duket se nuk e ka formën e marrëveshjes përfundimtare dhe pastaj kjo do të jetë taktikë e Serbisë që të sekuencoj në dy hapa: Hapi i parë që marrëveshja bazike kjo që po quhet plani franko-gjerman e hapi i dytë u kriju në momentin që synohet të jetë njohje legale, por Kosovës i kërkohet edhe diçka më shumë që i kërkohet tash. Këto dy rreziqe duhet t’i kaloj Kosova”.
Tutje, Konjufca tha se çështja e anëtarësimit në Këshillin e Evropës po ndërlidhet me dialogun.
/Shqip.com