KMDLNJ për dënimin e Zoran Vukotiqit: Shpresë për viktimat e dhunës seksuale

Këshilli për Mbrojtjen e të Drejtave dhe Lirive të Njeriut, ka reaguar pasi Gjykata Themelore në Prishtinë, dënoi me dhjetë vjet burg Zoran Vukotiqin për “dhunim seksual gjatë luftës”.

Në njoftimin e KMDLNJ, thuhet se kjo është shpresë për viktimat e dhunës seksuale në Kosovë.

“KMDLNJ në Prishtinë, dënimin e Vukotiqit e konsideron një hap drejt realizimit të drejtës për drejtësi për viktimat e dhunës seksuale gjatë luftës së fundit në Kosovë, si e drejtë e njeriut dhe shpagim moral për dëmet e pakompensueshme që i janë bërë këtyre viktimave. Dhunimi seksual përveç si krim lufte në Kosovë ka patur edhe karakter etnik”, thuhet ndër tjerash në njoftim.

“Për KMDLNj-ë, ky dënim ngjallë shpresat se krimet e tilla nuk do të mbesin të pandëshkuara pavarësisht se deri më tani numri i të dënuarve është më se simbolik. KMDLNj-ë konsideron se me këtë rast është vlerësuar puna e kësaj organizate për të drejtat e njeriut për faktin se ka ndihmuar në zbardhjen e këtij rasti e që ka rezultuar me shqiptimin e dënimit”.

“KMDLNj-ë shpreson dhe beson se ky dënim nuk do të mbetet rast i izoluar por se do të dënohen edhe dhunuesit tjerë aq më parë që krimet e luftës nuk vjetërohen asnjëherë kurse dhunimi seksual që përdoret si mjet për arritjen e qëllimeve politike dhe ushtarake është kualifikuar si krim lufte”.

Ky është rasti i parë në Kosovë, ku Gjykata shpallë fajtor një person për dhunim seksual gjatë luftës së fundit. /Shqip.com