Ekonomi Biznes

Ivanka Trump tregon detaje për ndërtimin e resortit në Sazan

Ivanka Trump, vajza e ish-presidentit amerikan Donald Trump gjatë një interviste në podcastin e Lex Friedman, ka folur mes të tjerash edhe në lidhje me resortin në ishullin e Sazanit.

Ajo ka zbuluar detaje në lidhje me akomodimin dhe arkitekturën e resortit, i cili do të operohet nga rrjeti luksoz i hotelerisë, ‘Aman’ në bashkepunim me kompaninë e kulinarisë Carbone.

“Tani për tani po punoj me burrin tim. Ne kemi këtë ishull prej 1,400 hektarësh në Mesdhe dhe po sjellim arkitektët më të mirë dhe markat më të mira. Aman do të operojë hotelin për ne, dhe ato do të jenë vila, dhe ne kemi Carbone që do të bëjë ushqimin dhe pijet”.

Përsa i perket arkitekturës, Ivanka Trump u bazua në imazhet e para digjitale që ilustrojne projektin e ndërtimit në fazën përfundimtare dhe shtoi se po përpiqet të respektojë topografinë ekzistuese, në një ndërthurje mes modernes dhe bashkëjetesës me natyrën.

Në deklarata të mëparshme, Jared Kushner është shprehur se ishulli i Sazanit është zona bregdetare më të pacënuara dhe unike ne bote.

Kompania e tij Affinity kërkon gjithashtu të zhvillojë zonën e Zvërnecit, pranë Vlorës, duke planifikuar ndërtimin e disa resorteve me afro 10 mijë dhoma hotelesh dhe vila.

/Shqip.com