Hoxha: Kosova s’do jetë temë në OKB

Përfaqësuesi i përhershëm i Shqipërisë në Kombet e Bashkuara, Ferit Hoxha tha se “Reforma e Këshillit të Sigurimit të OKB-së nuk ka mundur të përparojë prej 30 vitesh”, raporton Anadolu.

Hoxha mbajti një konferencë për media rreth marrjes së presidencës për herë të dytë të Shqipërisë për Këshillin e Sigurimit të Kombeve të Bashkuara.

Duke bërë të ditur se presidenti i Ukrainës, Volodymyr Zelenskyy ka mundësi që të zhvillojë një vizitë në New York në muajin shtator, Hoxha theksoi se kjo do të jetë vizita e parë e Zelenskyy-t në New York.

Në pyetjen se përse nuk është kryer ende reforma e KS-OKB-së, Hoxha tha se këtë situatë e cilëson si një “zhgënjim” në aspektin e kapacitetit kombëtar. Ai theksoi se çdo veto “merr peng” KS-OKB-në dhe se për këtë arsye institucioni nuk ka përmbushur ashtu si duhet detyrën e tij.

“Vendet anëtare nuk kanë mundur të arrijnë marrëveshje për zgjidhjen e problemeve themelore. Kjo është një situatë e vështirë, por ne e dimë që edhe në diplomaci çdo gjë nuk ndodh papritur (përnjëherësh). Ndonjëherë mund të ketë zhvillime në momentin më të papritur”, shtoi Hoxha.

Njëri prej tyre pyeti nëse Kosova do të jetë temë diskutimi e Këshillit të Sigurimit derisa Shqipëria është në krye gjatë shtatorit dhe se çfarë do të bëjë Shqipëria për të përmirësuar situatën në Kosovë dhe Serbia.

Hoxha, që më herët u përgjigj në çështje të ndryshme të mbarë botës, tha se këtë temë e njeh mirë dhe mund të flasë gjatë.

“Është një gjë që e di shumë, shumë mirë. Po provoj ta bëj në një minutë. Çështja e Kosovës dhe misioni i Kombeve të Bashkuara në Kosovë është në agjendën e Këshillit të Sigurimit. Ka qenë disa herë, është reduktuar disa herë dhe për arsye të mira”, tha Hoxha, derisa shtoi se Shqipëria ka kontribuar për ta zvogëluar numrin e diskutimeve për Kosovën në KS të OKB-së.

Ai tha se reduktimi ka ndodhur për dy arsye.

“Së pari, asgjë e madhe nuk ka ndodhur dhe së dyti Këshilli i Sigurimit nuk ka ndihmuar në të vërtetë në procesin e dialogut. Siç e dini procesi i dialogut është transferuar në Bruksel”, tha ambasadori shqiptar, i cili përmendi punën e emisarit Lajçak, ndihmën e SHBA-së dhe mbështetjen dhe investimet e vendeve që e përkrahin këtë proces të dialogut mes Kosovës dhe Serbisë.

Hoxha tha se po të arrihet që marrëveshja e fundit Kosovë-Serbi s’do të jetë nevoja më që tema për Kosovën të shtrohet në Këshill të Sigurimit.

“Siç e dini kemi një marrëveshje të arritur në Bruksel dhe aneksin e implementimit në Ohër. Palët gati, në pikëpamjen time komplet, por le të themi gati e kanë njohur njëra-tjetrën. Nëse ajo marrëveshje vihet në praktikë, neve nuk do të na duhen më takime të Këshillit të Sigurimit, neve nuk do të na duhet të shpenzojmë burime në misionin UNMIK-ut në Kosovë dhe të tjera”.

Ai tha se marrëveshja e nxjerr Serbinë nga lidhja e saj me ish-Jugosllavinë dhe Kosovës i hap rrugën e integrimit në BE.

“Unë jam absolutisht optimist që s’ka ndonjë tjetër alternativë për Serbinë ose Kosovën për të lëvizur përpara përmes dialogut, përmes zbatimit të marrëveshjes, përmes zbatimit të marrëveshjes së arritur këtë vit në Bruksel dhe Ohër, sepse kjo jep alternativën për Serbinë që të del nga bizneset e saj të papërfunduara të ish-Jugosllavisë dhe për Kosovën që të gjejë vendin e saj brenda Ballkanit Perëndimor, brenda Europës dhe për të filluar një proces sikurse gjithë të tjerët nëse duan, sepse e di që ata duan, integrimin në Bashkimin Europian dhe në NATO”.

Hoxha dha përgjigjen përfundimtare se Kosova nuk do të bëhet çështje gjatë këtij muaji.

“Kështu që, ne nuk do ta sjellim atë çështje në Këshillin e Sigurimit, sepse nuk është më një çështje e paqes dhe sigurisë. Për Kosovën është çështje ndërtimi i institucioneve, avancimin e tyre, përmirësimin e shoqërisë, integrimin në Europë dhe në NATO. Dhe Këshilli i Sigurimit nuk mund të ndihmojë në këtë”.

Hoxha mori edhe një pyetje tjetër në lidhje me Kosovën e Serbinë.

Një gazetar e pyeti atë për personat e zhdukur, dhunimet e vrasjet masive në Kosovë gjatë luftës, por ambasadori shqiptar tha se kjo periudhë s’duhet harruar, megjithatë duhet të lëvizet përpara.

“Në nuk mund të qëndrojmë aty. Ne s’duhet të harrojmë, por duhet të shkojmë përpara. Dhe mënyra më e mirë për të shkuar përpara është përmes dialogut. Mund të jetë i dhimbshëm, mund të mos jetë i lehtë, duhen sakrifica, askush s’mund të marrë 100%, por absolutisht s’ka alternativë tjetër përveç dialogut”, u përgjigj Hoxha.