Haxhiu për mbështetjen ndaj Jasharit: Përjashtimi nga PDK-ja – nderi më i madh që mund të më bëjnë

Deputeti nga radhët e Partisë Demokratike të Kosovës, Bekim Haxhiu, thotë se përjashtimi nga kjo parti për shkak të përkrahjes së tij ndaj Bekim Jasharit për kryetar të Skenderajt, kundër Fadil Nurës së PDK-së, do të ishte nderi më i madh që do të mund t’i bëhej, transmeton Shqip.com.

Kështu u shpreh ai në debatin televiziv në “Kanal10”, ku i ftuar përveç tij ishte edhe vetë Jashari.

Derisa u pyet nëse do të jetë prapë pjesë e PDK-së edhe pas zgjedhjeve lokale që do të mbahen më 17 tetor, Haxhiu tha se është PDK, është UÇK dhe është me familjen Jashari.

“Jam PDK, jam UÇK, jam me Familjen Jashari, jam me Bekim Jasharin dhe do të vazhdoj njëjtë me qenë”, ka thënë Haxhiu.

“Nderi më i madh që mundet të më bëjë për familjen Jashari, është të më përjashtojë. Ai është nderi më i madh që mundet PDK-ja të ma bëjë”, shtoi më tej ai.

Gjatë këtij diskutimi Haxhiu tha se PDK-ja është një parti e cila është krijuar mbi emblemën e UÇK-së andaj nuk duhet t’i kundërshtojë vlerat e saj duke dalë kundër Jasharit.

Madje ai duke ironizuar tha se “marre do të ishte po që se do të të mundte në garë Agim Bahtiri, e jo Bekim Jashari”.

Kundër Bekim Jasharit që po mbështetet nga Haxhiu, nga PDK garon Fadil Nura me mbështetje të plotë nga Sami Lushtaku, dega e PDK-së në Skenderaj dhe kryetari e kryesia e PDK-së. /Shqip.com