Autoritetet spanjolle thyejnë rregullin për Dani Alves

Autoritetet spanjolle kanë vendosur të ndryshojnë burgun ku për momentin qëndron i ndaluar në pritje të seancës gjyqësore futbollisti Dani Alves.

Mbrojtësi brazilian është arrestuar pak ditë më parë, pasi akuzohet se ka përdhunuar një 23-vjeçare në një diskotekë në Barcelonë.

Sipas “La Vanguardia”, futbollisti brazilian do të zhvendosët në burgun “Brians 2”. Ky burg i ri është vetëm 1 kilometër larg atij ku gjendet aktualisht, “Brians 1”, por kushtet atje janë të ndryshme dhe gjithçka bëhet për të shmangur probleme, jo për lojtarin, sa për vetë autoritetet spanjolle.

Ndonëse burgu “Brians 2” është vetëm për persona të cilët kanë marrë dënimin e tyre, siç nuk është rasti me Dani Alves, vendimi mendohet se është marrë për të shmangur ngjarje që mund të komplikonin situatën e lojtarit, por sidomos autoriteteve spanjolle. Në burgun e mëparshëm, Dani Alves ka qenë i vendosur në qeli i vetëm, por me ambiente të përbashkëta me të burgosurit e tjerë, përfshirë dushet.

Ka ndodhur në raste të mëparshme që të burgosurit kanë fotografuar persona të njohur në dushe dhe më pas kanë shitur këto fotografi. Raste të cilat më pas janë shoqëruar edhe me denoncime dhe çështje të komplikuara gjyqësore. Ndaj për të shmangur që një gjë e tillë të ndodhë me Dani Alves, është kaluar në një burg ku ai do të ketë dhomën me banjë dhe dush brenda.